Indian billionaire thar lam ber Byju Raveendran
28-Feb-2021, 10:02 PM
Keinin smart
phone kaltlanga social media leh a chhevela fiamthu kan thawh mai mai laiin
Kerala thingtlang tlangval – Byju Raveendran-a chuan a mobile application “BYJU’S – The learning App” tih hmangin
khawvel a dengchhuak a. Indian mihring chhiarsenloh kara billionaire tharlam
ber a rawn ni a. A company hlutzawng chuan 5.5 billion dollar a thleng leh ta
riap mai.
Byju Raveendran hi tunge?:
Kerala
tuifianriat kam Azikode thingtlang khuaah kum 1980-a piang a ni. Maths leh
Science zirtirtu fapa a ni a. An khuaah school a kal tluan chhuak zak a.
Government Engineering College – Kannur, Kerala-ah engineer a zir thung. Zirlai
a nih lai atanga mi dangdai, mi ngaihtuah loh lam atanga thil thlir thin, taima
leh thawkrim a ni. Mechanical Engineer a zir zawh hnu-in kum 2001 khan British
Lawng company pakhat hnuaiah a thawk a. Singapore-ah a awm thin. A nuam tih ber
(passion) chu zirtir hna (teaching) a ni. A nupui chu Divya Gokulnath niin fapa
pakhat an nei. A nupui hian a sumdawnnaah a pui nasa hle.
Engtinnge bul a tan?:
India ram
business school tha (Indian Institute of Managements ang chi) a lut turten
Common Aptitude Test (CAT) an exam thin a. He entrance test kaltlang hi a harsa
thawkhat bawk a ni ang, mi maktaduai tel coaching-ah kalin nasa takin chhun zan
zawmin lehkha an zir thin. Tum khat chu Byju Raveendran-a hi chawlh hmanga
India rama a lo haw-in a thiante’n CAT an lo exam tur chu a tihdan turte
enpuiin a tanpui hlawm a. Amah leh amah infiah nan, hunawl hman pahin amah
ngeiin a exam ve a. 100% a hmu ta mai a. A kum lehah pawh a exam leh a, 100% a
hmu leh a. A thiante, amah ngeiin a puihte pawhin CAT chu an paltlang ta hlawm
a.
A kalkawng
tur hmuchhuak taah a inngai a ni ang. Kum 2005 khan a hna bansan a. Kum 2006
atangin a hun pum chu coaching class a hawng tan a, a tirah chuan CAT exam
turte coaching class a pe tan a. A zirtirna dangdai leh tihdan phung chuan mite
beng a verh hle a. Kar ruk chhung lekin zirlai 1200 a nei ta mai a. CAT
coaching mai bakah IIT-NEE, NEET, IAS leh international entrance GRE leh GMAT
thlengin coaching an pe a. A huang a zauh zel a, India ram chhim lam khawpui
pakua laiah a zin kual a, coaching a pe thin. Classroom lian tak pawhin a
lecture pek a dawl zo ta lova. Auditorium lian pui a hire a, a khat tlatin a
coaching zirlaite an kalkhawm ta a.
A lo hausak chhoh dan:
Kum 2009
atang chuan a coaching class pek dan pawh a her danglam hret hret a. Amah kher
zin kual tawh lovin online coaching lamah a kal chho tan ta a. A eizawnna
tihlen zel dan turte, zirlai naupang zawkte’n hlawhtlinna an hmuh theihna atan
zir dan phung tihdanglam leh her danglam chu thupui berah a nei a. A tlangpui
thu-in India zirlai zawkte chuan mathmatics leh science chu an harsatna, a
bulthuta an man tawk loh dante a hmuchhuak belh zel a. Chu harsatna sutkianna
tha ber chu class hniam zawk lam atanga Mathematics leh Science zir dan dika
zirtir an ni tih chu a ngaihdan a ni a. Chu a vision chu a umin a um ta a ni.
A zirtirte
zinga a rintlak zual deuhte nen Bengaluru-ah inbengbelin kum 2011 khan company
“Think and Learn Pvt Ltd.” tih company a din ta a. An tum bulpui ber chu Mobile
Apps siam a, chumi apps hmanga hlimawm tak si, naupangin a hriatthiam ngheh
theihna tura zirna kalpui a ni. A company chuan sumpai bultanna (startup
capital) a nei mai bik lo. Investor hrang hrang an dawr kual a. An sum hmuh ang
angin “Byju’s - The learning Apps” tih mobile app chu kum li teh meuh chhung an
buaipui a. Kum 2015 khan he “Byju’s - The learning Apps” tih chu an tlangzarh
ta a ni.
Byjus’ an
tlangzarh atanga thla thum chhung lekin mi maktaduai hnih zetin an hmang hman.
Kumin 2019 March thla thleng khan subscriber maktaduai 35 an nei a. Byju’s hi a
course/class a zirin a fee a in-ang lova. Kum khat course hi Rs. 10,000/-
atanga 12,000/- inkar man a ni. A tira Class 6 atanga Class XII te tan chauhva
an siam chu tunah chuan Class I – 12 tan an siam ta zel a. Chu Byju’s thawm
thangva chu a na hle a ni ang, khawvel pum huap sumpai puktirtu (investor) te’n
an rawn inchuh ta ruih ruih a. “Byju’s tihlen zelna atan heti zat hi kan rawn
thawh ve ang e, a hlep tlemte tal min pe ve rawh u,” tiin US venture capital
firm – Sequoia Capital chuan million dollar 50 an rawn vawm a. China sum
puktirtu Tencent pawhin million dollar 40 an rawn thawhchuahpui a. Facebook
neitupa Mark Zuckerberg te nupa pawhin million tam fe an rawn vawm bawk.
Think and
Learn Pvt Ltd. ho kutchhuak “Byju’s - The learning Apps” chuan khawvel a deng
zau zel a. US company lar Disney te, education games company Osmo te, Japanese
company Benesse Holdings te leh Chinese company TAL Education Group te nen
thawhhona thuthlung an ziak mawp mawp ta mai a ni. Kumin March thlaa
Raveendran-a company hlutna hi 5.5 billion dollar a ni tawh a, chuta tang chuan
Raveendran-a hian 26% chanvo a neiin Indian zinga billionaire tharlam ber alo
ni ta a ni. A hausakna hi a pungchho zel dawn nia sawi a ni a. Educational Apps
leh Software lamah hian khawvel pumah market len zawng chu billion dollar 562
vel niin mithiamte’n an sawi. Byju’s hian engzat share tak chang chho zel ang
maw le??
Byju Raveendran-a’n enge a sawi?:
Pa inringtawk
leh taima Byju Raveendran-a chuan “Ka suangtuah ngailoh khawvelah ka lut a ni,”
tiin “sum leh pai hausakna hi ka um ngawr ngawr lova, ka nuam tih leh vei
(passion) ber ka tipuitling thei hi ka hlawhtlinna a ni,” a ti mauh mai.
“Vanneihthlak takin ka passion chu sumdawnna tha tak a lo ni,” a ti.
Billionaire alo ni ta chu engnge a ngaihdan tih an zawhna chu “No comments” a
ti. A hausakna chuan a nunah buaina a thlen loh hmel khawp mai.
Mizoramah
entrepreneurship boruak a vir chho ve mek a. He Kerala tlangval chanchin hi min
fuihphurtu lo nise. Mite’n “Hei hi a tha, he lamah hian sum a tam, hetah hian
sumdawnna bul kan tan ve teh ang,” ti ringawt lovin, kan nuam tihzawng, eng
anga rimtawng pawhin thawk ila hah kan hriat miah lohna tur kan tuizawng sector
lam luhchilh chat chat i zir thar ve teh ang u. ==
