Agriculture lama Entrepreneurship
28-Feb-2021, 10:04 PM
Tunlai khawvel hi mahni kutkawih eizawnna
khawvel a ni ta a. Entrepreneur hlawhtlingte’n ngaihsan an hlawh a. Ram
hmasawnna kipui an nih avangin eng sorkar pawhin a ngaihlu a. University leh
college lama “kei ka ni” inti chinte chuan tute emaw company leh sorkar hnaa
kal tum lovin “Ka mimal sumdawnna ka ti ang, (I will start my own venture)” tih
hi an intihhmuh ta a ni. Chu mahni kutkawih eizawnna chuan a huam zau em em a.
Information technology te, hotel leh restaurant industry te, nitin mamawh
eitur, thawmhnaw design, khualzin phurh kual, insak leh kawnglaih... a tam mai.
Tun tumah hian Agriculture lama entrepreneurship hi kan thalaite tan han
sawrbing ka duh.
Lo neih leh huan siama eizawngte hi
“Farmer” tia hriat an ni a. Khawvel eibar zawnna kalphung tlan chak tak maiah
hi chuan Agriculture hi “Business” zawnga kaltir a nih loh chuan a fuh thei ta
lova. Agriculture leh Business hi an kaihzawm a. “Agri-business” an ti ta mai
a, chutianga inhnamhnawihho chu “farmer” ti tawh lovin “Agri-preneur” an ti ta
ta zel mai a ni. Chutiang hawi zawnga keini Mizoram pawhin kan kalpui loh chuan
kan tifuh dawn lo tih hi a lang ta reng mai a ni. Kan thalai lehkhathiam sang
leh thiamsang lutuk lo pawh - Taima, thluak hmang peih leh rilru nei rana hma
lam thlirte tan chuan he “Agri-business sector” ah hian tihtur a tam lutuk a,
sum pawh a tam lutuk. Lo neih leh huan thlai siam, a thar chhuah suma chantir,
a market buaipui ringawt pawha hausakna tham sum a awm a ni.
Khawvel mi hausa ber pakhat Warren
Buffet-a fapa Howard Buffet-a chu a pa a hausak tehreng nen agriculture lam hi
a luhchilh daih a. A bultanna tur sumpai-ah a pa pawisa siki khat pawh a hmang
lo. Ama neih ang ang leh loan laa bultanin USA-a mi hausa list-ah a tel leh der
tawh. A sum leh ro hlut lam belhkhawm chu US dollar maktaduai 200 a ni rep mai.
A ni hi chuan Vaimim leh Bekang chin lamah hma a la a. US mipui mamawh 2% vel
chauh a thar thei chung pawhin heti hi a ni. Wales lam mi millionaire pakhat
Kevin Green-a thung chu a pa pawh farmer a ni a, a nung ho ve hle a. Zu a in
nasa a, a harhchhuak a, zu a nghei a. Loan a la a, bawng a vulh a. 1987 khan
bul a tan a. Tunah chuan Wales millionaire zinga a lar ber pawl a ni.
China ram thingtlang khaw
pakhat Sichuan province an tihah khian zirtirtu pakhat Liu Yonghao an tih chu a awm a. Thlatin hlawh laa khawsak tawk tawk chu
a ning ta deuh a. Zirtirtu hna atangin a bang a. A unaute a sawmkhawm a.
Bultanna tur sum a nei si lova, a bike leha sana bun lai a hralh a, dollar 120
(Rs. 7000/- vel) in bul an tan a. Mi varak leh ar vulh te an leikhawm a, an
hralh a. Zawi awiin anmahnin ar an vul chhova. An ti bek bek a. Tunah chuan
Chinese millionaire zingah an tel leh der tawh. 2016-a Forbes list-ah chuan an
neih rosum chu 4.1 billion a ni. Hma lam thlir thiamna, hmasawn duh takzetna
rilru, taimakna, thluak hman thiamna a awm phawt chuan mite hian an lo ti zel
thei.
Telegana
state-ah khawkheng a nasat avangin thlai leh thei an thar tha thei lova.
Loneitute’n an loan lak an rul thei lova, an mangang hle a ni ang tun kum 3
kalta chhung khan loneitu mi 2000 vel mahni intihlum anga sawi a ni. Chutih mek
lai chuan Taramatiphet thingtlang khuaa mi pakhat GN Naidu ve thung chuan ngaihtuahna hran alo
nei a. Tui a awm loh avangin buh chin chi a ni lo tih a hria a. A huana hnim
leh hlo te chu kuta tifaiin bawng a vulh a, a bawng chu company siam ranchaw pe
lovin thlai hnah chauh a pe a. Bawng-ek chu a thlai leh thei – Thingfanghma,
bean, tomato leh thlaihnah chawm nan a hmang a. Sumchang thlaite chu awmze
neiin a intahtawlin a ching a. Khawl emaw tractor engmah a hmang lo. Zing dar 8
atanga zan thim thlengin a thawk ta a. A thlai tharchhuahte chu laboratory-ah a
entir a, organic thlai – chemical tello a ni tih an finfiah hnu-ah chuan a tharchhuah
hralh tur a indaih thei lo. A hnathawhna kawngah chuan thil tam tak a zir
chhuak a, India sorkar agriculture scientist rualin an pan a, khawvel hmun
hrang hrang atangin an rawn pan a. US President George Bush-a pawhin a titipui
a. Agriculture zirlai mi 50000 velin a huanah case study an nei ta. “Thawhrimna
apiangah hlawkna a awm,” kan bible-in a tih kha maw.
Tuna kan
tihdan phung erawh hi siamthat hret a ngai thung. Kharchhawngin lo lu (farm
gate) ah an lo nghak a, a thartu ni lovin a khartu-in a man a chhiarsak a. Kan
thlai leh theite chu mipuiin bazar-a a zuartu (retailer) te hnen atangin man to
tak takin kan lei ta mai a ni. “Post-Harvest Management” an tih “thlai thar
chhuah tawh hnu awmze neia hlawk zawk tura sawngbawl leh zawrchhuah” hi a taka
kan luhchilh hma chuan a fuh thei ta lo a ni. Chu tak chu kan thalai,
lehkhathiam zawk, a ngaihna hre zawkte luh theihna chance tha lutuk a ni ta.
Thlai hmel itawm leh hrisel leh a sawngkawn leh itawm loh thliar hran (Sorting
and grading)te, a lei itawmna tura silfai leh han tuammawi te, organic thlai a
nih chuan a man han chhiar to deuhte, hralh tlak loh leh miin an lei duh loh
vawnthat leh thildang atana han sawngbawl (process) te, vai rama hralh chi pawh
mumal taka han tuamthat leh tuammawi (packaging) thleng hian sumdawnna hlawk,
Mizoram mamawh a ni. Hetiang ang “Post Harvest Management” course hi Mizoram
Food Processing Research & Training Centre (MFPRTC), Seling-ah course kan
nei reng a. Kan thalaite’n luhchilh se kan ram hmelhmang hi a danglam dawrh
dawrh ang.
Thlai leh
thei tharchhuah tam hrim hrim kawngah hi chuan kan ramin a zir loh avangin
khawi state mah hi kan umpha tak tak lovang. Kum tam tak an lo tlan tawh a,
phaizawl hmunremah thlai leh thei ngeih tur chemical fertilizer chintin reng
nen an chawm a. An thar hnem hle. Mahse, khawvelin chemical tel thlai
hlauhawmna te a hriat tak avangin hnualsuat an hlawh chho a. Khawvel hmun danga
thawnchhuah tlak a tlem ta a. India sorkar lu a hai ta a ni. Agriculture chu
business a nih miau avangin India ram economy a nghawng ta a. Organic lamah
thapui a thawh ta a ni. Chemical tello thei leh thlaite chu a man alo to deuh a
nih pawhin mite’n an lo duh zawk tho mai. India ram shopping mall lian ho -
Phoenix, DLF, City Centre, Lulu, Spencer, South City etc kan tih zawng zawng
hian “Organic Vegetable” zawrhna bik an nei vek ta a. Hei mai bakah hian Online
shopping lamah a lar zual ta zel bawk.
“Agriculture
business” kan tih hian heng – thlai leh thei chin, ran vulh, sangha khawi,
tharchhuah sengkhawm leh enkawl, a sawngbawl leh market thlengin a huap vek mai
a. A zira zir tham a awm. Mizoramin UT kan nih atanga kum 45 a ral hnu, state
kan nih atanga kum 30 a ral hnu hian kan tihdan ngai hlirin kan kal a. Lo leh
huan neitu kalkhawmna chu putar rual kalkhawmna turah kan ngai a. Thalaite’n
kan tihturah kan ngailo. Chuti chung chuan an thawhchhuah chu vawiin thlengin
kan la ei ve zel. Thalaite harh ila – kan lehkhathiamna te, youtube leh
internet site hrang hranga mite thiltih dan zir ila. Training mumal kal ila.
Tunlai khawvel thiamna hmangin “Agri-business” hi i luhchilh teh ang u. Sorkar
ringawtah innghat lo ila, eng engemaw scheme kan ban phaka kan lo chhawr
tangkai theih a awm a nih chuan chhawr tangkai i tum chauh ang. Sorkar-a
innghah tlat mai hi zawng a luhai thlak thin em mai.
Thianhovin
“team” din ula. Thil tul ang angah training la ula. Sawiho ula. Internet lam
luhchilh ula. Entrepreneurship zir ula. Mahniin inhai teh u. Tlu sual nawk nawk
ula. Tho leh ula. Che sual leh ula. Tho leh zel rawh u. Vawi leh khatah thil
lian tham lutuk ngaihtuah lo ula. Te reuhte-in bul tan ula. In kalkawng
(roadmap) fel taka duangin kum khatnaah hemi chin hi kan ti ang a, kum hnihna,
kum thumna, kum nga-naah chuan chutiang chu tih kan tum ang, ti ula. Ruihhlo
leh zu ruihna hun a awm ta love. He ramah hian Gujarati pa, Bengali pa, Burmese
leh Thai thalaite’n hma min rawn lak khalh ang e. India ram shopping mall lian
ho leh Aizawla mall awm ve Vishal leh Bazar India hian Mizoram tharchhuah
organic thlai, hmelhmang mawi, ei chakawm an zuar ve ngei tur a ni. Internet
online lamah pawh kan thalaite hian khawvel-ah kan thlai leh thei tharchhuahte
in zuar chhuak ve ngei tur a ni.