Mizoram Land of the Churches
28-Feb-2021, 10:15 PM
South
Australia khawpui Adelaide City hi “Biak in khawpui (City of Churches)” tia
hriat a ni thin a. He khawpuia cheng hmasa te’n Biak in nalh leh ropui tak tak
an lo din hming chawiin english novellist Anthony Trollope-a’n a lehkhabu ‘Australia and New Zealand’ tih a ziah
atanga an phuah a ni awm e. USA khawthlang lam Michigan state-a tuipui kam
khawpui lian vaklo ‘Holland’ an tih pawh hi “City of Churches” tia vuah a ni
bawk a. He khua hi Calvinist hratkhawkheng Dr. Van Raalte-in kum 1847-a a din
niin kohhran hrang hrang Biak in 170 vel a awm niin an sawi.
Kristianna-in
min luhchilh hnu hian eng kohhran pawh ni ila Biak in kan ngaipawimawh hle a.
Khawtin vengtinah kan Biak in chu a theih anga hmun lailum leh tha, langsar lai
takah dinin kan sum leh pai neih phak ang tawk aia tam mah zelin kan sa zel a.
Chu chuan a entir chu Mizote thinlung-ah hian kan Pathian biakna in hian hmun
pawimawh ber a luah a ni, tih hi a ni. Khawi khuaah pawh kal ila, khawi vengah
pawh kal ila mit la hmasa bertu, khawtin vengtina in lian leh manto ber ber chu
kan Biak In a ni zel mai.
Census
hnunhnung bera a lan dan chuan Mizoramah hian thingtlang khaw 817 leh khawpui
22 a awm a. Kohhran pangngai deuh chuan Biak in kan nei deuh vek mai a. A khaw
mal bika kohhran lian deuhin an sa lian a, kohhran te deuhin an sa te deuh mai
a ni a. A tlem thei ang bera chhutin khaw/veng khatah Biak In 3 theuh pawh lo
awm ta se Mizoram pumah hian Biak In 2517 aia tlem lo chu a awm hrim hrim tih a
hriat theih awm e. Statistics dik chiah hriat a chakawm khawp mai. Kan thlarau
lam chhungril nun chu engpawh lo ni rawh se, state te reuhte keini ang ramah
chapopui tham Biak in kan ngah tih hi a chiang khawp mai.
Khawvel
huapa mite min hriatna tur hi ngaihtuah a ngai khawp mai. Mi ram leh mi
khawpuite chuan hmingthanna leh larna an nei a. Engemaw thil an siam chhuah tam
vangte, buh leh bal emaw thei leh thildang an tharchhuah hnem avangin an hming
phuah a awl zel a. A nih loh pawhin an ram a mawi avang te, hmunzawl leh
rualrem tha, tuipui leh lui mawi tak tak an neih avangte-in an hming siamsak a
awl thin hle a ni mai. An ram a mawi em avangin Jammu & Kashmir state chu
“Heaven of India” an ti a. Artui an ngah avangin Andra Pradesh state chu “Egg
bowl of Asia” an ti leh mai a. Tuipui leh ramngaw chawivel, hmun nuam an nihzia
inpuan chhuah nan Kerala state chuan “God’s own country” tih an inphuah thung
a. Khawpui hming phuahah pawh chuti tho chu a ni. Thilsiamna an ngah avangin
Ahmedabad khawpui chu “Boston of India” an ti a. Thir sawngbawlna hmun a nih
avangin Jamshedpur khawpui chu “Pittsburgh of India” an ti a. Khawpui hring
reng mai an neih avangin Bangalore chu “Garden City” an ti a. Mumbai pawh
“Hollywood of India” an ti.
Khawvel ram hrang hrangte pawh hian hriat
awlsamna an nei zel a. Japan chu ni chhuak hmu hmasa ram an nih avangin “Land
of the Rising Sun” an ti a. Lal Isua pianna leh chetvelna ram a nih avangin
Israel ram chu “Holy Land” tia hriat an ni a. Ram ropui leh hlauhawm, mahse
khawvel ramdangte laka an inkharkhip tlat thin avangin China chu “The Sleeping
Giant” an ti thin. Chutiang zelin Switzerland chu ei leh in, bawnghnu leh
khawizu lama an hmingthan em avangin “Land of Milk and Honey” an ti thin. Sawi
tur a tam khawp mai.
Kan
“Zotlang ram nuam” hi engtinnge mite’n min hriat ve ang? Kan ram hi keinin mawi
kan tih ang hian mite’n mawi an ti lem lo mai thei. Keini’n hmeltha kan intih
ang hian mite’n hmeltha min ti lo mai thei. Buh leh bal thar chhuah lamah nise
han hmingthanpui tur chu sawi loh mahni pawh intodelh lo kan ni si. Leilung
hausakna lai chhuah lamah nise kan leihnuai hausakna haichhuah kan tum let let
chauh a ni si. Brazil-a Amazon ngawpui ang ramngaw thianghlim, la tukdar loh
ramngaw kan nei tawh bawk si lo. Lehkhathiam tamna state kan ni han ti dawn ila
Tripura takgial pawhin min lehpel leh tawh bawk si. Kan hmarchate sen thak leh
rimtui em em “Birds eye Chillie” lah Naga hovin a tharchhuaktu hmasa kan ni min
tih khalh leh tawh. Khawvel thilah khawvela han hmingthanpui tur leh han
inchawilarna tur hi kan nei mawlh lo a ni.
Pathianin Zofate min zawng chhuak a.
Welsh missionaryte’n Lal Isua zuitu hnamah min lo siam ta a. Khawvelah hian
hausa lo mah ila thlarau ramah hausa hnam kan lo ni ta a. A ropui hle mai.
Chutih rual erawh chuan tisa thilah pawh Pathian dik betu kan nih chuan kan
intodelh ve tur a ni tlat. Thlarau lama kan hausakna hi tisa thilah I kailut
thiam teh ang u. A hnam pum maia Kristian kan nihna hi khawvelah puang chhuak
ila. Mizoram chu Pathian biak ngaihsak hnam, thildang zawng zawng aia Pathian
biakna In ngaipawimawh hnam kan ni tih khawvelin an hriat theih nan hma I la
chhin teh ang u. “Mizoram is land of the Churches” ti ila. Aizawl khawpui pawh
hi “City of Churches” tiin invuah ila. Adelaide leh Holland khawpui ai pawhin
Biak in kan ngah zawk daih alawm.
He kan
nihna danglam tak hi khawvela kan invawrhlarna tura kan vanneihna leh dinchanna
tur a ni. Invawrhlar satliah mai ni lovin khualzin mite hip nan hmang ta hlauh
ila. Khualzin mi - Tourist ah rau rau pawh khualzin tha-mi ‘religious tourist’
emaw ‘pilgrimage” emaw ho bawh turin kan inhralh thei dawn a ni. Khualpang zin
satliah ho hi chuan Zu te, drugs te nawhchizuarte hi an mamawh nghal zel a.
Nawmchen paha khawvel fan duh kha an tam tlat avangin keini Mizo hnam, Kristian
dik tak te mizia nen hian a intuahrem thei lo a ni.
Sakhuana
thila khualzinte chuan Zu te, drugs te, nawhchizuarte an mamawh ve lo. Kan Biak
in te an rawn en ang a. Khawvel khawi hmunah mah awm ve lo Chawlhni tuka Biak
in dar ri chuah chuah te, mahni Biak in theuh pana kan inpel suau suau te,
piangthar leh piangthar da tawh pawhin kan ngaihpawimawh ber kan Sunday sikul
te an rawn chhim ang a. Thawhtan zana kan thalai inkhawm te, Thawhleh zana kan
Nuho inkhawm te, Nilai zan thupui kan zir dan te, Inrinni zana kan tawngtai
inkhawm te rawn chhimin khawvel ramdangte tana kan theih ang tawk tawka kan lo
tawngtai ve thin dante rawn hria se a va ropui dawn em. Heng khualzin zahawmte
thlenna atan hian Five star hotel ropui leh nuam a ngai lo. Mimal inah man
chawi thovin “home stays concept’ leh ‘bed and butter concept’ hmangin kan lo
mikhual mai dawn a ni.
Chumai
ala ni lo. Mizoramah hian englai pawhin kan revival speaker leh evangelist te’n
camping leh crusade an buatsaih deuh reng a. A chang sang leh chang chhah deuh
phei chuan “Taksa damna” inkhawm te an buatsaih deuh reng mai. Natna khirh leh
tihbaiawm tak tak tuarte pawhin damna kan chang mek a. Lal Isua zara
thilthlawnpek kan dawn heng damnate hi khawvel miten a zar rawn zo ve se. Thlarau damna leh tisa khawmpui (physical and
spiritual healing convention) te hunbi neiin kan siam zel ang a. He ramah hian
vunngo, vunhang, vun eng leh vun sen te’n Lal Isua rawn zawng sela a va tha
dawn em!!! Chuta tang chauh chuan Mizoram hian khawvel a dengchhuak ve thei ang
tih ka ring ta tlat mai.
