Khua kan tlai palh ang e
28-Feb-2021, 10:16 PM
Hmanah Mao Tse-Tunga chuan
"Thawk leh khata ram rorelna thlak thut hi dinner party emaw essay leh
lemziah mai a ni lova, thil-thui-par (embroiderry) mai mai a ni hek lo,"
tiin chutianga vawi leh khata ram kalphung thlak danglam thut tur chuan tha thawh
a ngai a, a tul chuan thisen chhuah tura silai chelek pawh a ngai a ni, tih chu
a ngaihdan a ni. Thu tha ziah leh sawi mai te, ngaihdan tha tak tak puanchhuah
ringawt maite'n awmzia a neih tawh loh chuan "thisen chhuah" duhtu an
awm thin reng a, chu chu history-ah kan hmu a. History chu alo thleng nawn thin
a ni, tih hi khuarel thudik a ni.
Kristian kan ni a, a huhova nun
thu-ah chuan duhthusam ram kan ni. Mimal nun thu-ah chuan belhchian dawllo tak
kan ni. Chuti chung chung chuan kan kristianna hian engemaw takin min uap bet
a. Thahnemngai au nazual deuhte'n "revolution" an han sawi pawhin
chutiang em chu kan ramah thleng turah kan ngai thei lo thin. Mahse, chuti
ngawt a ni lo. Thisen chhuahna hi kan ramah a hnai viau hian ka hre thin.
Tunhnai kum thum kumli vel chhung
hian kan ram dung leh vang, district khawpui hrang hrangah "eizawnna
ngelnghet dinna atana intuaihriamna programme" kan hmang fo mai a.
Programme 36 kan buatsaih tawh a, mi 1500+ in kan programme buatsaihte hi an
chhim tawh a. Thalai kum 18 atanga pavalai, tlema upa deuh kum 60 han pel hial
tawhte thlengin, hmeichhe tam tak tiamin hmaihmaah ngei ka hmu ve thin a. An
harsatna sawite ka lo ngaihthlaksak ve tawh bawk a. Chungte chuan an dinhmun
tleu tlat chhan bulpui berah sorkar an mawhpuh tlat mai. 'Sorkar' an tihah
chuan politician pawh an tel a, sorkar hnathawkte pawh an tel a ni.
Kan ramah hian dinhmun tleu
laklawh, theihpalingkawha bei ve a, lei rem rap hlei thei tawh lo kan tam ta
hle mai. Chu'ng mite chuan sorkar hi an taah an chhiar ve thei tawh tlat lo.
Mawl takin thlir dan an nei a - minister rual leh an chhungte, politician
tithei zualte hausak thut thutna, sorkar hnathawkte nawmsip bawlna ni maiin an
hria a. Duhsaktu nei ve lo leh sorkarna chang political party mi leh sa ni ve
lo tan chuan tangkaina neilo leh huam ve loh nia inhriatna (unwanted and
excluded feelings) an nei lian ta em em a ni. Sorkar chu a thei deuhte tana
ding leh rorel ni maiah an ngai a ni. Sudeep Chakravarty-a'n "You have to
create a complete society in which local people have meaningful stakes. The
point is if you don't govern that particular group of people, they are not
yours, they are not in your control," (Red Sun by Sudeep Chakravarty) a
tih hi a dik ngawt ang.
Chu chu alawm tunlai India himna
(security) tichhe thei lian bera an ngaih Naxalism emaw Maoism movement bul lo
intanna chu. West Bengal-a Siliguri bula Naxalbari thingtlang khaw te reuhtea
bul rawn intan kha kum 20 a vei meuh chuan state 11-a district 55-ah nghet
takin Maoism hian bu a khuar tawh a. Nitin thisen chhuahna a thleng a, sorkar
inrelbawlnain awmzia a nei thei lova, an support apiang inthlannaah an chak ta
mai mai a ni. A buaithlak lai ber chu Maoist-te thluak bur ber ber (think tank)
te chu Delhi khawpui chhungah, India zirna in ropui tak takah, University
mithiamte zingah an zi nuk mai a ni. Kum 2050-ah phei chuan India ram rorelna
in pui parliament-ah thuneihna nei tumin 'perspective plan' an nei riap tawh
mai a ni.
Tangkaina nei ve lo leh huam tel ve
loh nia inhriatna chuan ram a la chak em em mai a. Ni sensa hnuaia vahchap kang
ang mai a ni. Thalai thisen lum a luhchilh mek a. Eizawnna thua beidawngte
inhnemna a ni mek. Tunah hian khawi lai veng kilkhawr leh thingtlang kilkhawrah
emaw chuan tute emaw titi tui ber a ni tawh mai thei. Zawlnei ni miah lo mah
ila a hun a hla lo tih hi a va chiang em!! Kan CPI (Maoist) unaute lah chuan an
vahvaihpui chanchintha (?) chu khawvel ram zawng zawngah puandarh an tum ve mek
bawk a. Intelligence report hnuhnung berah chuan Manipur mai bakah Arunachal
Pradesh leh Assam-a tribal hnam thenkhatte an thlunzawm thuk hle tawh ni awm
tak a ni.
Kan thalaite zingah hian Delhi
University leh Jawaharlal Nehru University rap pha, Socialism rilru-in a hmin
tlat an kat nuk tawh a. Chu em la thleng pha lo - ngaihtuahna leh suangtuahnaa
ram inrelbawlna kal meka duhkhawp hmu zo lo, a ngai pet peta kal reng ringawt
mai duh lo tam tak an awm tawh mek a ni. Kan sorkar kalphung leh ziarang kan
thlak lohva, kan nihphunga lungawina (complacency) nena kan kal bek bek reng
mai chuan chu'ng kan nau thangthar lungfingte chuan kawng zawh tur dang an hre
lovang. Naxalism leh Maoism thlipuiin a nuai ve mai ang. Chu thlipui hlauhawm
lo thleng mai thei reng laka himna atan kan insawh ngheh a va hun tak em!!!
Engemaw kan tih chu a ngai ta a ni.
Party tin insanmar a hun ta. Engemaw thil ho mai maia inchirhtheh lova policy
thila insual a va han hun em! "Keini party chuan chu chu kan ti dawn a,
chutia kan tih chuan chutiang chu alo ni ang a, kan ram a dingchhuak ang,"
emaw ti sela, party dangin "Chutia tih chuan kan hnam himna khawih
chhiatin a awm thei a, heti zawk hian kan ti dawn a. Chutia kan tih chuan
chutiang chu alo thleng ang," tih ve a hun ta. NLUP te pawh tawngtaw
chirhtheh mai lovin, "Keini kan sorkar chuan heti hian kan tithung ang,"
emaw "He thil hi hnam tlukchhiatna tur a ni a, a rang thei ang bera
tihtawp a ni ang a, hemi policy aiah hian hemi policy hi kan ti zawk ang,"
kan tih a hun hle mai. A fawng vuantu pawhin mipui pawisa an khawih a, party
mal mi leh sa inhaivurna atan an policy an hmang a nih chuan constitution an
bawhchhia a ni tih inhria se la. Mipui huapzo teh se.
Kan kalphung pangngai let let a kal
hi a hun ta lo tih kan hriat a va hun em! Tawngkam maia inthlakthleng tulzia
sawi lovin chetzia-in kan kalphung thlak ila. File movement pangngai ngawr
ngawr piah lamah rilru leh ngaihtuahna seng ila, kan hnam ze mak tak nena
inhnerem turin kan hotute'n hma an lak a va han hun tak em! Thawk leh khata ram
rorelna thlak thut hi dinner party emaw essay leh lemziah mai a ni lova,
thil-thui-par (embroiderry) mai mai a ni hek lo. Thisen chhuak zawnga history
thlen nawntir lovin ‘thisen tello inthlakthlengna’ i thlentir teh ang. Kaa sawi
mai lovin ‘tha’ thawh teh ang u. Beidawnna nasa lehzualin min luhkhung vaih
zawngin khua kan tlai mai ang.
